灵欲嘅双重惊艳

春会 · 发表于 2014-11-26 09:42:24

蓝奕邦9月嘅新专辑《抚爱》，只其中一首《吸你》已经足够博人眼球。呢首歌听来都几动听嘅，曲好有旧日风范，暧昧到好似可以带人返到《花样年华》噉，听黑胶唱片着旗袍，吞云吐雾中男女渐渐变化到对望轻抚共舞，好有意境噉。
但都只得曲系噉，如果细心听歌词又或者睇歌词，则会发觉唔止系暧昧，而蓝奕邦把声又好啱唱呢种曲呢阙词，温柔暗哑，好似系耳边唱到，难免令人面红耳赤想入非非。
《吸你》系周耀辉所作，佢好擅长营造意境，令人好似可以感受到歌中嘅氛围噉，风流到尽头却唔会畀人觉得下流，非陈咏谦之辈可比拟。《吸你》，单单歌名已经好劲，睇来都应该系填词人写荤话中嘅歌名之最了，难得系周耀辉嘅精致精心，直白嘅《吸你》过后，系营造意境氛围嘅四句，“仿佛古巴烟丝，烧起春天湿气。刹那渗透五内，永远散发意味，只想轻轻的吸，此刻飘飘的你。永远也会化雾，刹那也要扑鼻。”只睇呢四句，仿佛烟雾缭绕嘅午后，二人亲密嘅低语呢喃温柔爱抚，耳鬓厮磨之际只勾引渴望。
所以跟住落来就变作直白嘅描述旖旎，灵魂闻到某地，灵魂闻着自己，灵与欲嘅交流达到某种极致，接近死亡，接近虚无，于是灵魂与自我完美结合，于是感受到天地。“你的气味，开天辟地。不要问和谁成为长存的。”喺天地之间只得你我共存，喺五识之中只得嗅觉，依然可以闻到你嘅气味，感受到你嘅存在，系开天辟地中我唯一嘅意义。情欲写到咁高级嘅境界，已经近乎于宗教嘅神圣，感官上体验到极致，“只想深深的吸，不懂刻刻的记。那怕世界再大，最细最有意味。就在大城路中，怎么找得到你。两个闭上耳目，活像突然未死。”世界再大，亦可感受到你，亦可感受到死，即是呢个世界嘅奇迹。缠绵至此，于是只余“四方诡祕，歇斯底里，你的气味”，系对《吸你》嘅最终解读，亦系完美收官。
其实周耀辉写情欲唔少，而且都首首精彩。年初汪峰新歌被批歌词露骨，一众网友不禁列举香港词人嘅露骨歌词反驳，原来大家常听嘅粤语歌中有咁多意境美却露骨嘅歌词，而周耀辉以《黑房》同《罅隙》两首令人叹为观止，由黄耀明把靓声唱出“感官的张开，生死的掩盖，我要你舌尖舔着我要害”同“当装饰统统撕去猝然望见罅隙，当中的风光吸引我潜入你”，可令人感受到灵欲嘅双重惊艳。
而家睇来，周耀辉于词人荤话嘅路上更进一步，《吸你》不可不听。

账号		自动登录	找回密码
密码			快速注册

[歌手交流] 灵欲嘅双重惊艳